ਸੁਡੌਲ ਸਰੀਰ, ਤਕੜੇ ਜੁੱਸੇ ਤੇ ਚੌੜੀਆਂ ਛਾਤੀਆਂ ਦੇ ਮਾਲਕ ਪੰਜਾਬੀ ਨੌਜਵਾਨ ਅੱਜ ਖਾਣ-ਪੀਣ, ਪਹਿਨਣ ਤੇ ਸੁੰਦਰ ਦਿੱਖ ਨੂੰ ਤਿਲਾਂਜਲੀ ਦੇ ਕੇ ਪੰਜਾਬੀ ਨੌਜਵਾਨ ਫੁਕਰਪੁਣੇ 'ਚ ਫੁੱਲੇ ਹੋਏ ਡੋਲਿਆਂ 'ਤੇ ਟੈਟੂ ਖੁਦਵਾਈ ਨੁਮਾਇਸ਼ ਦੀ ਵਸਤੂ ਬਣ ਕੇ ਰਹਿ ਗਿਆ ਹੈ। ਕੁਝ ਸਿਹਤ ਪ੍ਰਤੀ ਜਾਗਰੂਕ ਨੌਜਵਾਨ ਫਿਲਮੀ ਕਲਾਕਾਰਾਂ ਵਾਂਗ ਜੁੱਸੇ ਬਣਾਉਣ ਲਈ ਹੈਲਥ ਕਲੱਬਾਂ 'ਚ ਦੁੱਧ, ਘਿਓ, ਖੋਆ, ਪੰਜੀਰੀ ਤੇ ਮਿਹਨਤ ਛੱਡ ਕੇ ਉਸਤਾਦਾਂ ਆਖੇ ਲੱਗ ਨਸ਼ੀਲੇ ਟੀਕਿਆਂ 'ਤੇ ਘਾਤਕ ਦਵਾਈਆਂ ਨਾਲ ਫੁੱਲੀ ਹੋਈ ਸਿਹਤ ਬਣਾਉਣ 'ਚ ਲੀਨ ਹਨ। ਸਾਡੇ ਪ੍ਰਤੀਨਿੱਧੀ ਨੇ ਜਦੋਂ ਪੰਜਾਬ ਦੇ ਵੱਡੇ ਸ਼ਹਿਰਾਂ 'ਚ ਕੁਝ ਅਖੌਤੀ ਜਿਮਾਂ, ਹੈਲਥ ਕਲੱਬਾਂ ਬਾਰੇ ਜਾਣਕਾਰੀ ਇਕੱਠੀ ਕੀਤੀ ਤਾਂ ਅਜੀਬ ਤੱਥ ਸਾਹਮਣੇ ਆਏ। ਨਾਮ ਗੁਪਤ ਰੱਖਣ ਦੀ ਸ਼ਰਤ 'ਤੇ ਨੌਜਵਾਨਾਂ ਨੇ ਦੱਸਿਆ ਕਿ ਉਹ ਡੈਕਾਡਿਊਰਾਬਿਲੋਨ, ਡੈਕਾਸੋਨਾ ਤੇ ਪ੍ਰੈਕਟੀਨ ਵਰਗੀਆਂ ਸੀਟਰਾਈਡਜ਼ ਖਾ ਕੇ ਆਪਣੇ ਸਰੀਰ ਨੂੰ ਸਿਹਤਮੰਦ ਬਣਾਉਂਦੇ ਹਨ। ਨੌਜਵਾਨਾਂ ਨੇ ਦੱਸਿਆ ਕਿ ਇਹ ਦਵਾਈ ਉਨ੍ਹਾਂ ਨੂੰ ਉਸਤਾਦ ਹੀ ਲਿਆ ਕੇ ਦਿੰਦੇ ਹਨ ਕਿਉਂਕਿ ਕੈਮਿਸਟਾਂ ਵਲੋਂ ਪਰਚੀ ਤੋਂ ਬਿਨਾਂ ਇਹ ਦਵਾਈ ਦਿੱਤੀ ਨਹੀਂ ਜਾਂਦੀ। ਜਦੋਂ ਸਾਡੇ ਪ੍ਰਤੀਨਿਧੀ ਨੇ ਕੁਝ ਨਾਮਵਾਰ ਕੋਚਾਂ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ ਦਵਾਈਆਂ ਦਾ ਅਸਰ ਹੈ ਕਿ ਪਹਿਲਾਂ ਮੁੰਡੇ ਸਿਹਤਮੰਦ ਨਜ਼ਰ ਆਉਂਦੇ ਹਨ ਪਰ ਹੋਲੀ-ਹੋਲੀ ਉਨ੍ਹਾਂ ਦੀਆਂ ਹੱਡੀਆਂ ਖੋਖਲੀਆਂ ਹੋ ਜਾਂਦੀਆ ਹਨ। ਉਨ੍ਹਾਂ ਦੱਸਿਆ ਕਿ ਡੈਕਾਡਿਊਰਾਬਿਲੋਨ ਮੈਡੀਕਲ ਸਲਾਹ ਅਨੁਸਾਰ 15 ਦਿਨ ਬਾਅਦ ਕੰਮਜ਼ੋਰ ਮਰੀਜ਼ ਨੂੰ ਲਗਾਇਆ ਜਾਂਦਾ ਹੈ ਪਰ ਸਿਹਤ ਬਣਾਉਣ ਦੇ ਸ਼ੌਕੀਨ ਮੁੰਡੇ ਇਸ ਨੂੰ ਤਿੰਨ ਦਿਨ ਬਾਅਦ ਲਗਾਉਣਾ ਸ਼ੁਰੂ ਕਰ ਦਿੰਦੇ ਹਨ। ਨੌਜਵਾਨਾਂ ਵਲੋਂ ਬੇਸਮਝੀ 'ਚ ਲਈਆਂ ਜਾ ਰਹੀਆਂ ਇਹ ਘਾਤਕ ਦਵਾਈਆਂ ਸਿਹਤ ਲਈ ਗ੍ਰਹਿਣ ਤੇ ਬੀਮਾਰੀਆਂ ਦੀ ਦਲਦਲ ਸਾਬਤ ਹੋ ਰਹੀਆਂ ਹਨ।
ਪੀਜ਼ੇ, ਬਰਗਰਾਂ, ਨੂਡਲਜ਼ ਤੇ ਹੋਰ ਜੰਕ ਫੂਡ ਨੇ ਪਹਿਲਾਂ ਹੀ ਨੌਜਵਾਨਾਂ ਦੀ ਪਾਚਨ ਸ਼ਕਤੀ ਖ਼ਤਮ ਕਰ ਰੱਖੀ ਹੈ ਉਪਰੋਂ ਪੈਸਟੀਰਾਈਡਜ਼ ਨੇ ਹਾਰਮੋਨ ਦਾ ਸੰਤੁਲਨ ਵਿਗਾੜਨ 'ਚ ਕੋਈ ਕਸਰ ਨਹੀਂ ਛੱਡੀ। ਇਸ ਸੰਬੰਧੀ ਚਿੰਤਕਾਂ ਨੇ ਨੌਜਵਾਨਾਂ ਨੂੰ ਆਪਣੇ ਸਰੀਰ ਫਿਲਮੀ ਕਲਾਕਾਰਾਂ ਵਰਗੇ ਨਹੀਂ ਸਗੋਂ ਮਿਹਨਤ, ਮੁਸ਼ੱਕਤ ਨਾਲ ਓਲੰਪੀਅਨ ਸੁਸ਼ੀਲ ਕੁਮਾਰ ਵਰਗੇ ਬਣਾਉਣ ਦੀ ਸਲਾਹ ਦਿੱਤੀ। ਉਨ੍ਹਾਂ ਮਾਪਿਆਂ ਨੂੰ ਨੌਜਵਾਨਾਂ ਦੀ ਸੰਤੁਲਤ ਖੁਰਾਕ ਸੰਬੰਧੀ ਚੇਤਨ ਹੋਣ ਦਾ ਸੱਦਾ ਦਿੱਤਾ ਤਾਂ ਜੋ ਪੰਜਾਬ ਦੀ ਖੋਹੀ ਹੋਈ ਦਿੱਖ ਵਾਪਸ ਲਿਆਂਦੀ ਜਾ ਸਕੇ।
Post Comment
